रौतहट, ७ भदौ।
१९ वर्ष अघि गौरमा भएको चर्चित हत्याकाण्डलाई लिएर सर्वोच्च अदालतले छानबिन एवं अनुसन्धान प्रक्रिया अघि बढाउन परमादेश जारी गरेपछि जसपा लगायतका नेताहरु आन्दोलित बनेका छन्। सोही क्रममा शनिबार गौरमा विरोधस्वरूप मशाल जुलुस प्रदर्शन गरिएको छ।
गौरको विपीचोक घण्टाघर अगाडि बाट सुरु गरिएको मशाल जुलुस भोलि हुने वृहद् जनप्रदर्शनको पूर्वसन्ध्यामा गरिएको जसपा नेता तथा संविधानसभा सदस्य बबन सिंहले बताएका छन्। उनले गौर घटना तत्कालीन प्रभु साहको हठबाजीकै कारण भएको दाबी गर्दै राज्य पनि समान रूपमा जिम्मेवार रहेको बताए। सिंहले अहिले आएर अनुसन्धानको नाममा पुरानो फाइल खोल्नु गैरन्यायिक भएको टिप्पणी गर्दै, जनयुद्धको समयमा रौतहटमा भएका अन्य हत्या घटनाहरूको समेत अनुसन्धान हुनुपर्ने माग गरेका छन्।
मशाल जुलुस कार्यक्रममा पूर्वमन्त्री योगेन्द्र यादव, प्रदेशसभा सदस्य बाबुलाल साह, रामकिशोर यादव, शोभा साह, अनिल सिंह, किरण ठाकुर, रामेश्वर राय यादव, राजकुमार दास, श्यामविहारी यादव लगायतका नेता तथा कार्यकर्ताहरूको उल्लेखनीय उपस्थिति रहेको थियो।
नेताहरूले अदालतको आदेशको विरोध गर्दै गौर घटनामा निष्पक्ष छानबिन नभई राजनीतिक द्वन्द्वलाई मात्र उजागर गर्ने प्रयास भइरहेको आरोप लगाएका छन्
