रौतहट भदौ १८ गते ।
बाढी तथा प्राकृतिक विपद्बाट प्रभावित नागरिकको राहत र उद्धारमा सहयोग पुर्याउने उद्देश्यले नेपाल बार एसोसिएसन रौतहटले १ लाख १ हजार रुपैयाँ आर्थिक सहयोग गरेको छ।
बार एसोसिएसन रौतहटले उक्त रकम प्रधानमन्त्री दैवी प्रकोप उद्धार समितिको खातामा जम्मा गरेको जनाएको छ। देशका विभिन्न क्षेत्रमा बाढी, डुबान तथा प्राकृतिक विपद्का कारण नागरिक प्रभावित भइरहेका बेला पीडित परिवारको राहतमा आफ्नो तर्फबाट योगदान गर्ने उद्देश्यले रकम सहयोग गरिएको हो।
नेपाल बार एसोसिएसन रौतहटका जिल्ला अध्यक्ष हेमचन्द्र लाल कर्णले विपद्को कठिन समयमा रौतहटका कानुन व्यवसायीहरूको तर्फबाट पीडित नागरिकलाई सहयोग पुगोस् भन्ने उद्देश्यले रकम प्रदान गरिएको बताउनुभयो।
उहाँले विपद्को समयमा सरकारको प्रयाससँगै संघसंस्था, पेशागत संगठन, नागरिक समाज तथा आम नागरिकले समेत सामाजिक उत्तरदायित्व निर्वाह गर्नुपर्नेमा जोड दिनुभयो।
“देश पीडामा रहेको बेला रौतहटका वकिलहरूको तर्फबाट केही सहयोग पुगोस भन्ने उद्देश्यले प्रधानमन्त्री दैवी प्रकोप उद्धार समितिको खातामा १ लाख १ हजार रुपैयाँ जम्मा गरेका हौँ,” अध्यक्ष कर्णले भन्नुभयो।
बाढी तथा डुबानबाट प्रभावित परिवारलाई तत्काल खाद्यान्न, आवास, स्वास्थ्य सेवा तथा अन्य अत्यावश्यक सामग्रीको आवश्यकता रहेको अवस्थामा बारले गरेको आर्थिक सहयोगले राहत तथा उद्धार कार्यमा केही भए पनि टेवा पुग्ने अपेक्षा गरिएको छ।
कानुन व्यवसायीहरू न्याय र कानुनी अधिकारका क्षेत्रमा सक्रिय रहने भए पनि प्राकृतिक विपद्का बेला मानवीय सेवामा समेत अग्रसर हुनु सामाजिक उत्तरदायित्वको सकारात्मक उदाहरण भएको बताइएको छ।
राहत, उद्धार तथा पुनःस्थापनाका लागि विभिन्न क्षेत्रबाट सहयोग जुटिरहेका बेला रौतहट बारको यो योगदानले अन्य पेशागत संगठन तथा संघसंस्थालाई पनि विपद्का समयमा पीडित नागरिकको साथमा उभिन प्रेरित गर्ने अपेक्षा गरिएको छ।
रकमको आकारभन्दा पनि विपद्मा परेका नागरिकप्रति ऐक्यबद्धता जनाउँदै गरिएको यो सहयोगले मानवीय संवेदना र सामाजिक जिम्मेवारीको सन्देश दिएको छ।
